Bèste luu, dinsdig höbbe veer al weer ’t nuuj sezoen geäöpend. Veer höbbe ós weer geweldig thoes geveuld bie café Oos Heim, bie Lile en Jo woveur nogmaals ózze hartelike dank
 
Veer zin toen mit de foto’s nao ’t Weverke getrokke óm ze dao weer officieel aan de moer te hange mit es beteikenis dat ’t Weverke dit jaor ózze tempel is. 
Iëesj höbbe veer de brónze Taarman op ’t pleintje ene groet gebrach en de Taarman aan de gevel in ’t leech gezat. 
Prins Cars I kreeg de opdrach om mit ’n car, symbool van zien baan bie Nedcar gekoppeld aan ziene naam Car (s) euver de finish te rieje, in dit geval lètterlik de deur van de café in te rieje compleet mit finishvlagge etc.
 
Oos jubilarisse van aafgeloupe jaor zin nogmaals bedank. Marcel veur zien 22 jaor lidmaatsjap bie ’t Carnavalscomité en de 4 senior dansmarietjes die gesjtop zin nao 11 jaor danse, Naomie, Liza, Myron en Nadine . Ouch Janine haet nog e bleumke gekrege veur de väöle verdeenste veur de ansmarietjes ómdat ze gesjtop is mit leiding gaeve aan de dansmarietjes. 
 
Han is nogmaals geneumd veur de waalverdeende orde van verdeenste die zie ’t aafgeloupe jaor haet maoge óntvange. 
 
De 4 nuuj comitéleden Bram, Patrick, Harold en Max zin officieel geïnstalleerd es comitélid en veer wunsje hun väöl plezeer binne ós vereiniging. 
 
Kómmend sezoen höbbe veer al weer 2 jubilarisse binne de vereiniging. André Eijssen is al weer 11 jaor bie de Taarbreuk en Vors/veurzitter Gé is al 11 jaor vors van de Taarbreuk. Hae haet ummer gezag dat hae dit 11 jaor zou doon en dat ’t dan good is óm dit sjtekske door te gaeve dus zal dit zien lètste jaor es Vors van de Taarbreuk zin. Hae blif waal nog gaer e paar jaor veurzitter van de Taarbreuk! En Pascal weurt dan de nuuje Vors van de Taarbreuk. 
 
Veer houpe uch allemaol te maoge begroete kómmende zaoterdig op ‘t 12de leedjesconcours in de Fiëeslokatie in De Steeg bie Soons Interieurbouw in ‘n prachtige antieke sjpegeltent. 
 
Op 29 november is in ’t gemeinsjapshoes ’n groat Carnavalstreffe van de vief Carnavalsvereiniginge van Groat Nuth mit es thema Same Äöpene. Dao zit geer ouch van harte veur oetgeneüdig. ’t Belaof ene geweldige aovend te waere mit 3 artieste en DJ Iwan. D’r is geine entré me ’n vrie biedrage is welkom . 
 
Ouch zulle veer de volgende waek mit ós sjteunkaart langs de deur kómme in de houp dat geer de Sjömmertse Vastelaovend royaal sjteunt. 
 
Ich sjleet aaf mit Alaaf names vors Gé, Prins Cars I en de Wieze Raod.